Lajme

Zvicër: Mbi 14 mijë kosovarë më shumë brenda një viti

Rritja prej 14414 kosovarëve brenda një viti nuk është shtim real i popullatës kosovare por vjen si rezultat i ndërrimit të shtetësisë nga ajo serbe në atë kosovare

Numri i të huajve në Zvicër është afër për të arritur shifrën 2 milionë. Sipas shënimeve më të reja statistikore që i ka publikuar sot Zyra Federale për Migracion (BFM/OFM), në fund ë muajit prill të këtij viti në Zvicër kanë jetuar 1906.753 banorë me shtetësi të huaj. Kjo është për 3.3% ose për 60204 më shumë në krahasim me një vit më parë.

Sikurse edhe deri më tash, numri me i madh i të huajve vijnë nga shtetet e BE-së dhe EFTA-s, gjegjësisht 1 milion e 295714 veta ose 68% nga numri i përgjithshëm i të huajve. Numri i të huajve nga këto shtete është shtuar gjatë një viti për 4.1%.

Nga ana tjetër, Zvicrën brenda vitit e kanë braktisur 68950 të huaj, raporton BFM/OFM.

Numri i të huajve nga shtetet e treta (jashtë BE/EFTA) në fund të prillit ka qenë 611039, dhe është rritur për 1.6 për qind në krahasim me një vit më parë, kur ai ishte 601388. Nga maji i vitit 2013 deri në fund të prillit 2014 në Zvicër kanë ardhur të jetojnë 151852 të huaj, ose + 1.5% më shumë se në periudhën 2012-2013.

Kur dihet se nga Zvicra brenda periudhës maj 2013 – fundi i prillit 2014 kanë shkuar 68950 të huaj, shtimi “neto” i të huajve në Zvicër ka qenë 82902 të huaj.

Nga të gjithë të huajt, shtimi më i madh është regjistruar te shtetasit kosovarë. Gjatë periudhës për të cilën raportohet, numrit të të huajve në Zvicër i janë shtuar 14414 kosovarë. Pas tre shtimin më të madh e kanë shënuar portugezët (plus 12599), gjermanët (plus 7503), italianët (plus 6937) dhe francezët (plus 6285).

Nga ana tjetër, rënien dukshëm më të madhe të numrit e kanë shënuar shtetasit e Serbisë me minus 13990. Larg pas tyre vinë në radhë kroatët (minus 734), boshnjakët (minus 606) etj.

Tendenca e rritjes së popullsisë kosovare, e cila ka filluar të shfaqet në statistikat e popullsisë së huaj në Zvicër që nga shpallja e pavarësisë së Kosovës, ka vazhduar edhe në statistikën e fundit. Rritja prej 14414 kosovarëve brenda një viti nuk është shtim real i popullatës kosovare në Zvicër. Ajo vjen kryesisht si rezultat i procesit të ndërrimit të shtetësisë që kosovarët po e bëjnë në vazhdimësi, nga ajo serbe në atë kosovare. Kjo lëvizje reflektohet edhe në rënien e madhe (minus 13990) të regjistruar të numrit të shtetasve serbë në Zvicër.

Aktualisht, sipas regjistrimit të publikuar nga BFM, në Zvicër jetojnë 99606 shtetas kosovarë dhe 76907 shtetas të Serbisë./albinfo.ch/.